高比抱病爭MVP之王

一年一度籃壇盛事NBA東西岸明星賽明早在奧蘭多上演，今屆賽事星味極濃，東岸有美國「夢幻隊」未來正選陣容，而西岸就有洛城四星孭飛！不過今屆焦點相信都離唔開高比拜仁及「主人家」杜域侯活身上，皆因高比仔有望超越「波神」成為明星賽得分王，一向好勝嘅佢又點會錯過機會；至於「魔獸」就盛傳會最後一次代表魔術出戰明星賽，兩位仁兄肯定搏老命爭取MVP殊榮。（高清翡翠台及now 635周一早上8時30分直播）

ＭＶＰ次熱門勒邦占士揸住贊助商飲品，真係識做。（美聯社圖片）

攞多19分過埋波神頭

高比拜仁在歷屆全明星賽累積攻入244分，只要明早再有十九分進帳，就可以超越「波神」米高佐敦，成為全明星賽得分王。當中兩屆常規賽得分王杜蘭特已講明甘願做配角，賽前表明會成「仁」之美，聯同基斯保羅齊齊餵波，務求助「小飛俠」一臂之力，谷爆得分數字。此外，高比仔同時亦會吼準MVP殊榮，力爭職業生涯第五次奪得呢個獎座，獨享全明星賽「MVP之王」美譽。不過高比仔賽前抱恙，缺席了記招。

「魔獸」做東想攞尾彩

高比仔要做「MVP之王」都唔容易，事關今屆「票王」兼主人家杜域侯活亦有共同目標，希望在明星賽威番次做MVP後光榮離隊！盛傳「魔獸」將於下月15日轉會限期前過檔籃網，意味大有可能係最後一次為魔術出戰全明星賽。美媒《Hoops》尋晚亦爆料，指東岸三位正選韋迪、勒邦占士及戴歷羅斯都會「讓路」，希望造就「魔獸」捧走MVP完美告別奧蘭多。