林書豪踩場PK大帝
「林瘋」林書豪迎來職業生涯最大挑戰，皆因佢明天將要率領紐約人作客邁阿密，迎戰有「大帝」勒邦占士坐鎮嘅熱火，上演一場天使戰魔鬼！林書豪近期人氣爆燈，先後KO過高比拜仁、約翰禾爾及傑特等星級戰將，風頭咁勁難怪勒邦占士都事先張揚會親自「招呼」J.Lin！（now 635周五早上8時直播）
擁有三巨頭嘅熱火被視為爭標熱門，由林書豪孭重飛嘅紐約人就係人氣隊伍，賽前有消息指兩代美國總統奧巴馬及克林頓，因為都身在邁阿密，所以好可能會入場觀戰，屆時場內外肯定星光熠熠。由於J.Lin狀態大勇，紐約人王牌安東尼亦識做，賽前表明願做綠葉：「我希望林書豪繼續掌管控球權，我同史杜迪米亞會全力協助。」
占士請纓防守書豪
據當地票務網站《TiqIQ.com》顯示，由於「林瘋」魅力沒法擋，今場波飛平均票價高達510美元（約4,000港元），比熱火今季嘅主場賽事票價貴超過一倍，但依然十分搶手。不過林書豪要過關絕對唔易，事關熱火尋日以120比108砌低帝王，以７連勝姿態強勢迎接紐約人，據悉勒邦占士更已經自動請纓，計劃喺關鍵時刻親自「嘜」實林書豪，反而由「防守專家」柏堤亞看管安東尼，可見在占士眼中，J.Lin比「甜瓜」更難應付。
事實上「大帝」過往亦曾化身控球後衞「招呼」對方王牌，最佳例子就係上季季後賽應付公牛嘅戴歷羅斯，「大帝」表示：「考慮到林書豪嘅狀態，我哋一定唔會輕敵，熱火全體球員會齊齊煲帶研究J.Lin，以便作針對性部署！」雖然林書豪狀態大勇毋庸置疑，但考慮到「甜瓜」復出後未重拾狀態，「Ａ米」史杜迪米亞自胞兄去世後情緒亦受到影響，造訪大熟大勇嘅熱火輸波機會較高，主隊讓4.5分可追捧。