波總獲政府資助下重組香港代表隊，重金禮聘蘇格蘭籍澳洲名帥摩力克帶隊，頭炮熱身賽二月廿九日對中華台北，波總亦打算大搞，聘請推廣公司宣傳，將呢場港台對決重新包裝，希望比賽當晚令旺角場爆滿。
推廣同包裝係推廣公司嘅專業，佢哋有自己嘅角度同睇法，不過要令呢場港台之戰爆棚，就唔係想像中咁容易。雖然旺角場只得6,600座位，但慣常睇本地波嘅球迷其實只得3、4千人，就以今屆省港盃為例，首回合喺大球場舉行，入場人數係4,165，實際買飛只得3,002人，以此推斷，呢場港台大戰嘅入場人數都係咁上下啫。
再細心睇，今屆省港盃其實有唔少gimmick，好似港隊召入多位即將入籍嘅洋將，對手省隊亦派近年最強陣容，多位國腳及前國腳列陣，加上省港盃有卅幾年歷史，毋須解釋太多球迷都會入場，結果都係得4千人。
至於二月廿九日嘅港台對決有乜賣點亦十隻手指數晒，呢場係摩帥首場賽事，一個時代嘅起點，點兵均以一月份有表現嘅球員為主，多位中小型班嘅年輕球員都獲徵召，再數可以講埋香港嘅世界排名跌至168，仲低過167嘅中華台北一位，希望由呢場開始谷底反彈；至於中華台北，對方最出名嘅比利時甲組腳陳昌源No Show，去年十月龍騰盃又曾經畀港隊大炒6比0，因此一般球迷對佢哋興趣不大。
港台之戰喺旺角場舉行，地點比大球場吸引，但估計入場人數唔會比省港盃多，都係4,000人左右，點樣再叫多2千人入場，就要睇有乜新搞作嘞。
波男