話說筆者朋友某日出席聚會，為免褲袋太壓迫，所以將銀包同車匙放喺枱上面。一個冇心嘅舉動，竟然引來席中一名20歲港女注意，成晚係咁黐住朋友唔放。港女仲好主動要朋友送佢返屋企，朋友覺得「路邊野花不要採」，最終好禮貌咁婉拒咗。
不過，好多NBA球員就抵受唔到呢種誘惑，每次作客比賽都會背住老婆或女友四圍偷食。根據俄勒岡州立大學（OSU）一項調查指出，運動員比普通人更易偷食，除咗因為經常出外比賽，另一個原因係因為大部分女性好難拒絕同身材健碩嘅運動員發生關係。湖人魔術莊遜曾經講過，實在有太多女仔鍾意「收集」球星，一來有成就感，二來可以向傳媒爆料攞着數。
以為艷福無邊，實質係飛來橫禍！高比拜仁就係因為過去10年同過105個女人發生婚外情，結果老婆雲妮莎決定同佢離婚，仲分咗佢成億美金身家，偷食代價實在太大。至於前超音速球星甘普同6個女朋友生落7名私生子，淨係贍養費就花咗210萬美金，相等於林書豪3年人工！
或者各位NBA球星學吓聲稱性伴侶超過兩萬嘅張伯倫，每次都錄音，證明雙方你情我願，又做足安全措施，咁就冇手尾跟啦！
台灣《美國職籃》專欄作家邱益忠，自初中起不自禁地戀上NBA，對每支球隊有着獨特見解，以風趣幽默形式同你論盡NBA！