【本報綜合報道】今季NBA可謂「多災多難」，解決停擺問題後，開季前又傳來噩耗，去季彈起嘅前火箭中鋒希斯證實患上心包炎，生命飽受威脅，原本同佢簽下巨額合同嘅帝王已決定取消合約，而希斯亦係繼謝夫格連因患動脈瘤宣布提早收咧後，今季第二個檢查出心臟有問題嘅球員。
去季於火箭彈起、場均貢獻7.9分及8.1個籃板嘅希斯，季前約滿轉投帝王並簽訂一份為期四年總值2,100萬美元（約1.6億港元）嘅巨額合同，本應前景一片光明，豈料薩克拉門托傳媒尋日爆料，指該名28歲中鋒患上致命心臟疾病心包炎，復出日遙遙無期，帝王亦宣布將希斯嘅合約作廢。
心臟問題近年肆虐NBA，鷹隊中鋒積遜哥連斯六年前就因心律不正逝世，而塞爾特人前鋒謝夫格連日前就患動脈瘤宣布提早收咧，如今希斯嘅病情比格連更嚴重，情況令人擔心。另一方面，火箭自希斯離隊後，一直希望羅致一位高大中鋒接姚明班，該隊昨日終於如願以償，以兩年總值1,370萬美元（約1億港元）合約簽入6呎11吋高嘅達林拔，加強內線力量。