「大帝」勒邦占士終於擺脫「最乞人憎」污名！財經雜誌《福布斯》尋日公布了今年「十大最乞人憎ＮＢＡ球員排行榜」，占士由上年大熱「勝出」微跌一級。搶走佢「一哥」位置嘅竟然係籃網「大茄」堪富利斯，皆因佢同視星前妻Kim Kardashian短短結婚72日被飛，球迷覺得佢冇鬼用囉！
根據《福布斯》調查顯示，有50％調查對象都討厭堪富利斯，令佢力壓擁48％嘅上年盟主勒邦占士，成為乞人憎之王。有專家分析堪富利斯之所以「爆冷」跑出，主要因為佢今年同真人騷女星Kim Kardashian閃電結婚72日後，就遭女方拋棄離婚，表現懦弱丟盡男人架。其實堪富利斯只係一名「超級大茄」，打波多年都係大後備，如果唔係同Kim拍拖，根本冇乜人識。加上佢本身又唔係靚仔有型，所以好多人覺得佢高攀Kim，靠女方先可以見報。
上年因為以直播形式宣布轉投熱火，而惹怒不少球迷嘅勒邦占士，經過一年時間後終於冇咁乞人憎，跌落第二位。有球評家就建議占士要將今次「進步」化成動力，去改變過往不可一世嘅性格，學高比仔收斂狂妄專心爭冠。
至於「小飛俠」高比拜仁就緊隨其後排第三，高比仔近年努力塑造好爸爸及好老公形象，可惜最近又被老婆雲妮莎踢爆「沙沙滾」，並且同佢劃清界線離婚，高比仔形象大插水，睇怕明年都有可能趕過「大帝」及堪富利斯，榮登首位。
1.堪富利斯（籃網）
靠前妻名氣上位，72日短暫婚姻被寸冇用。
2.勒邦占士（熱火）
冇本心叛徒，性格目中無人。
3.高比拜仁（湖人）
多年前涉強姦案成永恒污點。
4.柏加（馬刺）
背前妻伊娃偷食令形象插水。
5.阿堤斯（湖人）
聯盟「麻煩友」代表，搞事搞非惹人生厭。
6.保殊（熱火）
被寸係占士手下，球迷最憎見球星屈膝輔助另一球星。
7.安東尼（紐約人）
為錢離開母會金塊，冇本心。
8.皮雅斯（塞爾特人）
敢言，但就成日講錯野得罪人。
9.韋迪（熱火）
熱火「三巨頭」成眾矢之的，韋迪因此不受歡迎。
10.奧當（小牛）
同藝人KhloeKardashian結婚，被球迷批評「賴蝦蟆」。
本報綜合報道