球員怒告NBA索償187億
Daniel好嬲，真係好嬲！究竟幾時有NBA睇o架？隨着NBA球員工會否決咗資方修訂方案，聯盟決定再取消多兩周賽事，總計涉及103場常規賽。球場封館球員亦冇糧出，深知職業生涯有限嘅球員將聘請律師以反壟斷法起訴NBA聯盟，追討三倍賠償金額，達到24億美元（約187億港元）之高。
NBA進入「核冬天」，急凍咗全美周邊經濟，單是達拉斯便有800名相關員工放「無薪假」。聯盟決定延長停擺，宣布取消12月15日前嘅所有比賽，據ESPN報道，勞資談判至今每名球員平均損失22萬美元。
高比率先唔見1638萬
有估計指損失最大嘅湖人球星高比拜仁，就足足收少咗210萬美元（約1638萬港元）。另雅虎報道去年大施銀彈打造「三巨頭」的邁阿密，當地損失可能達2億美元。
球員工會執行主席比利亨特已向NBA總裁史端提出免責聲明，解散球員工會。除咗安東尼、比立斯及杜蘭特球星於加州法院提出指控NBA外，一班新秀球員及沒有合約在身嘅自由球員，則以原告身份在明尼蘇達提出訴訟，指NBA停擺嚴重危害球員「非常短期」的職業生涯，索取「三倍賠償」，以球員在這段時間損失8億美元計算，三倍賠償達24億美元（約187億港元），如果再拖下去，時間愈長，所賠償的金額就愈多。
羅斯涉召妓唔畀錢
另外，上季常規賽MVP公牛主將戴歷羅斯涉嫌召妓唔畀錢！據美國一位化名阿Bee的性工作者爆料，指戴歷羅斯上季隨隊作客時，曾與阿Bee一名「姊妹」發生性行為，點知戴歷羅斯事後竟然笑笑口唔畀錢，估唔到形象健康嘅佢原來咁Cheap，真係人不可以貌相咯！