澳門大賽車今日撻着！

超級波子矚目亮相

除咗澳門三大賽事，最令車迷起哄莫過於澳門GT盃，皆因呢項賽事有兩款辣車登場，首先介紹是2012 Porsche 911 GT3 R，捷成車隊係全球首支使用呢款新車嘅車隊，首次喺澳門東望洋上陣，屆時會有原廠工程師隨隊，對於新戰車，車手艾明達指其4公升6汽缸引擎嘅進氣系統經過優化，馬力提升了20匹至500bhp，配合經過改良嘅六前速序列式波箱及自動補油控制系統，加速性能得到大幅增強，採用撥片換檔，轉波速度更快，前軸改配較軟嘅防傾桿，能減低轉向不足嘅現象。講到咁犀利，到時就要睇清楚。

GT盃另一輛新車，就係麥拿侖車隊嘅MP4-12C GT3，呢架跑車首次喺亞洲亮相，據報MP4-12C GT3嘅公路版全球限量發售二十部，售價34.5萬歐元（約350萬港元），採用一級方程式嘅方向盤、座椅及電力系統，擁有F1感受。

歐陽若曦係香港奪標希望。

超級辣車2012 Porsche 911 GT3 R強勢登場。

ＨＫ之光強勢登場

唔少澳門大賽車嘅車迷，都會特別留意本港車手嘅動向，數最大名氣嘅必屬「波子王」歐陽若曦（Darryl）啦，儘管Darryl賽完FIA世界房車錦標賽中國站後，已無緣爭奪獨立盃（Yokohama Drivers' Trophy），但澳門係佢嘅「最愛」兼半個主場，所以Darryl表明會在今站放開懷抱一拚，以答謝中、港、澳同胞。

第二年參加整季WTCC嘅Darryl，目前在獨立盃總排名列第六，佢賽前透露：「今季目標確係要贏獨立盃總冠軍，縱然已經落空，但東望洋係我最喜歡嘅賽道，我一定會盡力喺主場車迷面前贏冠。」同場仲有三名香港車手馬清揚、伍家麒同盧家駿，佢哋都係征戰多年嘅好手，一樣要留意佢哋表現。

另一個大家要留意嘅香港車手，係參加格蘭披治大賽車三級方程式賽事嘅方駿宇（Adderly），20歲嘅方駿宇舊年首次進軍東望洋賽道，雖曾炒車，但最終能完成比賽，在31位參賽者中排名21。Adderly今年征戰2011年British Formula 3 international series，吸取經驗後重臨澳門，表現令人期待。

飲飲食食預埋你玩

你未必係好迷賽車，但遇着一年一度大賽車，都想過去湊熱鬧，睇車可能只係你三日兩夜澳門遊入面一個節目，不過唔緊要，澳門一早預咗有呢啲遊客，大把賽車以外嘅嘢等緊你。

如果你只係想湊熱鬧，建議你去買今日同聽日門票，因為即使係大看台，呢兩日都只係50蚊，如果星期六、日就要成450同550蚊，其實呢兩日都有排位賽，刺激程度唔差得過正賽日，一樣可以感受到賽車嘅速度同汽油味。

其餘時間，你可以去澳門唔同地方旅遊買手信，大賽車委員會喺澳門多個地方遊客熱點包括議事亭前地、氹仔官也街、三盞燈圓形地、關閘廣場、祐漢公園及塔石廣場都設置大型電視屏幕，為你緊貼整個賽事。

合家歡去澳門當然要去西灣湖廣場嘅澳門美食節一嘗美食，過百個攤位開到夜晚十一點，包唔會悶親。