本地波今季有專屬電視頻道直播，令更多市民有機會接觸球賽，但亦發生唔少尷尬場面，例如早前一場聯賽有個龍門向隊友爆粗直播出街；銀牌賽南華被深水埗逼和，隊長李海強賽後廿秒內提出七個問題，之後走咗去，搞到節目主持人唔知點算！
球員爆粗梗係唔啱啦！不過咁，踢波爆粗係好常見，高水準球賽如英超，都成日見朗尼同泰利等大牌球星粗口橫飛，本地波成立嘅專屬頻道，搞到球員爆粗都入埋屋，你話點算？
英超球星知自己爆粗出街，通常都會道歉，賽會亦會罰款，其實波總都可照辦，好似交通警向違例泊車抄牌咁，罰球員幾舊水當係小懲大戒。
至於賽後訪問呢個問題就比較複雜嘞，「強哥」竟然可以喺咁短時間內好有條理咁提出南華嘅七個問題，而佢自己講完一大堆嘢之後即閃，唔畀主持人繼續問落去，其實好多人都想知究竟發生咩事，搞到「討論區」議論紛紛。
球員接受訪問嘅技巧其實係可以執吓嘅，歐洲高水平聯賽都有專門課程，教導球員如何應對傳媒。本地波頻道成立後，球員曝光率大增，波總喺呢方面都要諗諗計，因為提升球賽形象都係重要工作嚟o架。