ＮＢＡ勞資雙方仲未傾掂數，賽季重開遙遙無期，是非亦愈來愈多，早前有傳球員工會主席費沙係「二五仔」，背叛工會私自同ＮＢＡ總裁史端達成協議。眼見事態嚴重，費沙日前就親寫公開信表忠誠，指一切只屬謠言，從未有出賣工會意圖。
早前有傳聞指球員工會出現內部分歧，工會主席費沙有意向老闆們作出讓步，但其餘球員就堅決反對，其後即傳出費沙係「二五仔」，打算與史端私底下訂協議，簽署「不平等條約」。不過，費沙日前已強烈否認，並寫下公開信表示會堅持到底：「其實我一向不會就失實報道作解釋，但今次實在太離譜，我一直都與球員們同在，從沒有作過任何私底下協議或單方面談判，那些『消息』分化不了我們！」
此外，費沙亦在公開信透露希望球迷忍耐，因為球員只係想得到一個最平等嘅協議，而呢個協議好可能會影響多年，所以球員必須繼續抗爭。
ＮＢＡ持續停擺，球員絕對最受影響，原本10月31日就係ＮＢＡ延長新秀合同截止日嘅最後限期，但由於停擺，所有日子都被無限期押後，意味08年新秀包括上季常規賽ＭＶＰ戴歷羅斯在內，過千萬美元豐厚合約隨時泡湯！至於熱火班主米奇阿里遜，日前就因為在Twitter討論停擺而被聯盟罰款50萬美元。