中國足球隊今個月初喺世盃外圍賽輸畀伊拉克，出線凍過水，面對國足表現不濟困局，內地傳媒報道中央準備落重藥打救，將推出三大措施，分別係成立足球辦公室、強化校園足球，同埋央視全面恢復轉播中國足球。
為振興足運，香港有鳳凰計劃，而內地就有三大措施，雖然名稱唔同，但其實都係做同一樣嘢，就係完善架構、搞好青訓同加強宣傳。香港鳳凰計劃展開，第一件事就係改組董事局同修改會章，跟住就全球招聘CEO及代表隊教練、各隊推出足球babies、電視台合作成立本地足球頻道，下個球季將會創辦超級聯賽，新措施陸續出台，令人睇到整個球圈充滿朝氣。
雖然內地球圈環境複雜幾萬倍，但要搞好足運，方法其實大同小異，首先係改組權力架構，由國務院牽頭成立足球辦公室，除咗中國足協，發改委、財政部、稅務總局、中國人民銀行各部門都參與其中。
強化校園足球，亦即搞好青訓，青島現正籌建一所中國足球大學，而喺國家推動下，全國校園足球將會日益蓬勃。
加強宣傳方面，有消息指中央電視台明年全面復播中國足球，包括中超、足協盃、各級國家隊、青少年聯賽及校園足球，上述內容熟口熟面，同港甲嘅24小時足球頻道幾乎一樣，不過內地足運由國家撐腰，力度同成效肯定大好多！
波男