守龍興合合 門神3女俠
球愛敢死隊出動！體育版「優質雄性動物」接受號召，組成一支史無前例兵團，走訪娛樂圈及各界靚女，講吓佢哋對波的感受，當中有愛情、奇情、癡情……乜情都有，務求要你讀完之後愛到死為止！
俗語有云「三個女人一個墟」，如果3個熱愛足球、開心活潑嘅美少女聚埋一齊，結果又會係點？咪一個充滿球味嘅靚墟囉！今期《球愛敢死隊》由拿仁擺下擂台，請來本季新加盟大埔Babies 3人組 Vanessa、Icy同Janelle，全面考驗3位靚女嘅足球知識同球技，估唔到佢哋既睇得又踢得，守龍門保方上身，個個都能力保不失，勁到阿媽都唔認得！
紅軍Q&A 答啱晒
拿仁一向係利物浦Die Hard粉絲，考驗佢哋當然係要問有關紅軍嘅問題，但結果估唔到佢哋唔單止知道利物浦攞過18次英格蘭頂級聯賽冠軍、5次歐聯錦標，連加歷查擅長擺烏龍、丹尼爾艾格鍾意紋身都知埋，最後7條問題答中晒，攞足100分。喂！你哋係咪出貓架？
文鬥之後輪到武鬥，拿仁攞個波出來試試佢哋腳法，其中以Icy最有板有眼，無論攞波、黐波都好耍家，仲識用掃把腳交波：「我細個有同男仔踢波架！有次仲踢到飛甩咗隻黑鞋！」而Vanessa同Janelle就好得戚咁話自己係打龍門出身。拿仁雖然平時打開後衞，但一向以腳頭重見稱，有邊個唔識我「東方倉魚」先？就等我射爆你哋啦！
點射都畀佢哋接實
第一個接受挑戰嘅係Icy，呢個妹妹無論高波同地波都接到實一實，點解咁勁？原來小妮子打開排球，所以身手好敏捷。第二個係「大埔迪基亞」Janelle，呢名球員身高腳長，拿仁笠波完全考唔到佢。到你喇Vanessa，呢個妹妹最驚青，接波前扮晒米奇老鼠好cutie，但我唔會「留腳」嘅！但無論我射左定射右，Vanessa都兵來將擋接到實一實，我認輸喇！
圖：司徒子文