日之泉JC晨曦保持強勢
今季矢志挑戰聯賽錦標嘅晨曦，昨晚於大球場與南華打成0比0，開季3戰1勝2和保持不敗，升上聯賽第2位，至於南華表現持續低迷，繼開鑼戰不敵屯門後，昨晚再度失分，令新教練高世安壓力大增。
昨晚共有二千七百七十六名球迷入場，場面尚算熱鬧。兩隊今仗陣容均略有變動，南華收起陳肇麒，改以基奧雲尼及戴倫攻堅，而晨曦則有隊長高尼路因傷缺陣，羅拔圖墮後與基藍馬扼守中路，廣東日之泉借將侯宇首次正選把關。
少林兵變陣冇料到
比賽初段晨曦攻勢不俗，黃鎮宇及鄭少偉輪流在兩翼策動攻勢，但南華企穩陣腳後，開始取得較多控球權，上半場30分鐘，南華出現黃金機會，倒戈嘅基奧雲尼禁區內勁射，可惜略門而過，半場兩隊互交白卷。換邊後南華先後以蘇沙及歐陽耀冲入替，希望加強邊路攻勢，但效果不大，前線新援戴倫狀態平平，未能起牽制作用，踢到下半場中段，中堅祖爾更因傷退下火線，由梁振邦入替。
南華比賽末段試圖加強攻勢，但晨曦防線表現出色，羅拔圖及後備入替嘅卓卓瓦解咗唔少攻勢，而晨曦嘅突擊亦相當有威脅，可惜前鋒巴利未能把握，踢到82分鐘，梁子駿主射罰球幾乎建功，門將葉鴻輝撲救後中柱，最終雙方兩無紀錄，各得1分。