升降機歷經散班 荃灣半世紀興衰
港甲近年積極推行地區化，但其實七、八十年代球市興旺時期，已經有地區球隊踢甲組，其中荃灣就曾多次在甲組亮相，荃灣現任秘書曾錫滔可以話係球會興衰嘅活字典，由六六年開始為荃灣披甲，到現時重組參加丙組，都係滔哥親自落手落腳，見證荃灣四十多年歷史。
曾錫滔表示：「六十年代荃灣埋班，政府邊有理過我哋，都係鄉事會、仁濟、生力啤，再搵幾位老闆幫忙，先至搞得成，球員當然搵番土生土長嘅荃灣人，出過嘅球員有何國光、何國良、陳世芳、陳衍鳴、顧錦輝等。」
08年再度組軍踢丙組
七一年荃灣首次升班，當年班費都要成三十萬，踢咗一季就降班，到八○年再升班，到八三年降班，八四年再度升班，嗰次會方決定大搞，班費達到七位數字，直至八九年中，球會宣布解散。滔哥指出：「當年解散嘅原因都係經費問題，老實講，每年籌班費實在唔容易，加上同期一班球員相繼退役，先至唔再搞。」
滔哥話，多年來好多謝一直支持球會嘅熱心人士，包括地產商周厚澄，以及圓玄學院嘅鄧錦雄，仲有幾個贊助商，○八年荃灣再度組軍參加地區丙組聯賽，立即獲得各方支持，令球會得以重新運作。