重返英雄地執教荃灣 黃興桂出山！

港甲新球季有四支地區球隊，分別係大埔、屯門、深水埗同埋天水圍飛馬，但講到地區足球始祖，一定要數荃灣。荃灣六十年代已參加丙組聯賽，曾多次升上甲組，最令人津津樂道，就係八十年代後期，多次殺入盃賽決賽，而當時嘅靈魂人物，就係「桂神」黃興桂。

南華過客 東方荃灣感情深

黃興桂表示：「我由新加坡返嚟香港之後，除咗講波，仲有空餘時間，所以希望為香港足球出一分力，我教過三隊波，分別係東方、荃灣同埋南華。教南華時間好短暫，我只屬於過客，但東方同荃灣就好有感情，荃灣區內有好多熱心搞波人士，好似荃灣區議會主席周厚澄，鄉委會主席鍾偉平，同埋陳偉明議員都係我多年戰友，佢哋出到聲，我梗係要出番分力啦！」

黃興桂嘅名句之一，就係「蔗渣嘅價錢，踢出燒鵝嘅味道」，原來深井陳記燒鵝係荃灣足球隊贊助商之一，果然夠晒地道。黃興桂表示：「我成日喺深井食燒鵝打躉，夜晚亦喺荃灣嘅有線講波，依家教埋荃灣，係真正嘅荃灣人，我兩次豹隱暫別球圈，都係荃灣搵番我，我對呢隊波真係好有感情！」

資源充足 實事求是全力以赴

荃灣上季排丙組地區聯賽第四名，來季有冇信心升班？黃興桂表示：「政府推行鳳凰計劃，若然情況許可嘅話，我哋當然想升上港甲或港超，但我係一個實事求是嘅人，唔鍾意空口講白話，最緊要係『做好今日』，只要肯付出，日後必有回報。」

Peter認為，荃灣最大優勢就係資源充足，除有區議員支持，最重要係場地設施佳，平時操練同比賽嘅城門谷運動場，可容納五千人，即使踢甲組比賽亦應付有餘，另外間中亦會喺海濱公園練波，遠少少又有青衣東北公園，佔盡地利。

活用金句 燒鵝足球名留香江

就記者現場所見，黃興桂多年冇教波依然寶刀未老，而且同年輕人溝通確有一手，懂得利用「金句」增加趣味性，例如「禁區攞到波你就生日喇！」、「TEAM字係冇I嘅，謹記唔好個人主義！」年輕球員聽完呢啲金句入晒腦，似乎相當受落。

黃興桂接受訪問時，還自備「金句」方便編輯起題：「綠茵場內冇煩惱，回到球場興致高！」人生活到六十多歲依然多姿多采，每日做自己鍾意嘅事情：講波、教波、寫專欄，做電台節目，試問有邊個人唔羨慕呢種生活呢？相信繼全能足球、性感足球同快樂足球之後，「燒鵝足球」亦會名留香港足球史！

圖／文：陳卓犖、黃兆崑