澳洲桌球公開賽已經展開角逐，唔少頂級好手已飛抵澳洲準備賽事。根據海外博彩公司Paddypower嘅賠率，希堅斯暫時以5倍成為大熱奪標球手。由於「火箭」奧蘇里雲受到頸及背部傷患困擾而缺席，大大增加咗希堅斯嘅奪標機會，成為熱門好合理。
至於次熱門係6倍嘅威廉斯，呢位兩屆世錦賽得主今年曾攻下德國桌球公開賽，狀態良好有望揚威澳洲。而金髮靚仔球手羅拔臣雖有主場之利，但海外莊家唔多睇好，奪標賠率有成10倍咁好分，似乎有多少暗湧。另外近期人氣急升嘅卓林普有17倍，又睇吓呢個桌球新星表現如何。