永倫總冠軍3連霸

潘志豪打出「香港精神」!昨晚在修頓室內場爆發的甲一籃球總決賽終極決戰,永倫憑負傷上陣的隊長潘志豪「半場翻生」,率領球隊以75比61擊敗「宿敵」南華,總場數3比2登上總冠軍寶座!連同今季的「三連霸」,永倫踏入2000年後的12屆賽事中8度封王,「籃球王者」之名捨我其誰!

在Game4得分掛零的永倫絕對主力潘志豪,原來一直受右膝傷患困擾,但昨晚仍食止痛藥「紮住上」。就是那份堅持感染一眾隊友,拿下昨晚奠定勝局的Game5。

潘志豪昨晚雖在上半場得分仍然「捧蛋」,但37歲中鋒蔡芳裕表現驚人,轟入10分率永倫半場以33比27領先。易邊後甫開賽阿豪終以三分球開齋,永倫在他帶領下更打出一段11比2的攻勢,並一口氣把領先優勢擴展至15分。潘志豪單在此節便射入3個致命三分球,助永倫將比數拉開至55比41進入第四節。

羅意庭攞28分都唔掂

有14分在手的永倫,最後一節繼續保持勇猛,最終贏對手14分完場,方誠義為球隊貢獻15分為全隊最高,而全場最高得分為射入28分的羅意庭,可惜他未能替南華捧走獎盃。

永倫隊長潘志豪賽後坦言能夠贏得冠軍負傷上陣都值得:「一年最重要就係呢幾場波,即使有傷都冇辦法,一定要頂硬上,雖然食咗藥,但都擔心傷勢,依家贏咗冠軍,乜都值得啦。」

總決賽最後戰果

Game5 永75:61南

Game4 南77:61永

Game3 南88:65永

Game2 永78:76南

Game1 永63:58南

5場3勝制,永倫勝3:2

近5季總冠軍

冠軍 亞軍

11 永倫 南華

10 永倫 南華

09 永倫 南華

08 南華 福建

07 永倫 南華