今季一級方程式賽車可以用一面倒嚟形容，効力紅牛車隊嘅維度爾喺頭八個分站贏六場咁多，喺車手榜已經拋離對手成條街。而根據威廉希爾最新公布，維度爾奪得今季車手總冠軍嘅賠率已經調低至1.07倍，部分海外博彩公司索性封盤唔受注，以防有巨額投注重押喺「新車神」身上。
為迎合現今一級方程式形勢，博彩公司開出唔少特別盤口，例如維度爾贏晒餘下十一個分站、維度爾可提前幾多分站贏得總冠軍等。至於今季亞軍車手方面，以麥拿侖嘅英國車手咸美頓最熱，暫時為3.25倍。