郁吓就跌 為禍港籃 作為籃壇老將，蔡芳裕仍然保持着一團火！對於一眾後輩小將的表現，阿裕直斥道：「我最睇唔過眼嘅係班細路成日『插水』，碰一碰就攤開兩手大聲咁嗌，博球證吹罰。呢啲咪會阻礙到香港籃球發展囉！大家諗一諗，班細路慣咗唔撞得之後，一去到代表香港同外國球手對碰，就一定畀人撞到飛起，○九年東亞賽就係最好例子！其實，籃球係男子漢衝撞性運動，咁『玻璃』要受保護嘅話，不如去打乒乓球！」
願做奸人 帶旺球市 要數永倫最受歡迎球員，蔡芳裕未必榜上有名；但若論對家「擁南躉」的頭號柴台對象，阿裕自稱當之無愧！他表示：「老實講，咁多人向我『開汽水』係一件好事！以前啲球迷睇波，立場多數中立，但係依家各隊都有忠實fans，佢哋噓我只係想影響我嘅表現，證明自己喺球場打得好！我唔介意做反派角色，愈多人噓我就代表球市愈旺，如果有七千人一齊柴我台，我會更開心！」最後，阿裕笑言自己的甲一生涯中，唯一遺憾便是沒有當過偶像派球員！