倫敦奧運男足亞洲區外圍賽，中港代表雙雙喺次圈出局，連亞洲十二強分組賽都入唔到，中國足協已就國奧出局向公眾道歉，但香港波總就冇乜反應，何解？因為下屆東亞運同亞運男足先至係波總嘅重點賽事，奧運外圍賽輸波，香港奧運隊仲未收工架！
奧運出局後，國奧就地解散，今屆U23一敗塗地，中國足球難成氣候，想佢哋衝出亞洲唔知等到幾時。至於香港足球就簡單得多，一於目標為本專向「次級賽」埋手，實行密食當三番！
港足喺對上兩年嘅東亞運同亞運取得好成績，正合孫子兵法以上駟對下駟策略，參加上屆東亞運同亞運嘅港足成員，大部分來自08奧運隊，其他對手就用備戰倫敦奧運嘅球員參賽，港足平均年齡高人哋一截，要攞成績自然比較容易。
同類情況其實喺球會級別賽事已經出現，香港球會冇資格參加亞冠盃，退而求其次玩次一級嘅亞協盃，水準低好多，但一樣可以吸引大量球迷捧場，帶旺球市。其實以港足水平，一早應該降格玩亞洲最低級別嘅亞洲挑戰盃，只係時機未到而已。
所以話港足冇份踢倫敦奧運，唔使咁垂頭喪氣，因為2013年東亞運同2014年仁川亞運，先至係港足嘅重要戰場，依家呢隊港奧隊大可keep住繼續練，留番嚟緊嘅東亞運同亞運再搏過。
波男