前日溫網休戰，但男單「Big4」動態仍好惹人關注，依家「狗仔隊」消息咁靈通，佢哋一舉一動又點逃得過傳媒嘅追蹤呢。
梅萊瀨尿相「瘋傳」？外國圖片社發表一張梅萊練習後，坐喺場邊打電話嘅相，竟然見佢褲襠位濕咗一大片，異常礙眼。不過相信只係梅萊大腿內側出汗所致，希望佢下次換番條深色褲，唔好再出醜囉。
祖高域原來係爬樹高手！話說佢日前唔記得帶鎖匙出街，於是按房東指示，爬到屋外一棵樹上攞後備匙，呢單滑稽花絮被剛啱揸車經過嘅「寶島球星」盧彥勳目擊，即時喺微博散播。另外，祖高域嘅愛狗因檢疫問題唔准入境英國陪佢打波，搞到佢心掛掛。
費達拿賺廣告商嘅錢，已到「神級」功力，即使唔使親自出鏡都照收錢，好似近日鬚刨商吉列就喺一個足球場咁大嘅草地，噴上費天王個樣，加埋1000公升白泡泡「扮」剃鬚膏，創下「史上最大剃鬚」紀錄，條片食正溫網個勢，喺網上熱播添！
曾經「大癮」到賽前喺更衣室練Golf嘅拿度，終於可以真正落場揮桿，「野獸」趁住前日休戰，就孭起高球桿袋，苦練「抓小鳥」技術，其實佢同新科美國高球公開賽盟主麥艾萊咁Friend，得閒可以約埋練習偷師吖。