機場射水賀小牛凱旋
小牛歷史性首奪NBA總冠軍，球隊於美國時間周一飛返達拉斯，飛機一停低，機場方面就用高壓水槍勁射機身慶祝，更有大量球迷在場歡迎奪標英雄凱旋。小牛勝利遊行將於當地時間周四早上舉行，屆時場面肯定墟冚！
熱火仍係下季奪冠大熱
小牛班主古班叼着雪茄，捧着冠軍獎盃首個步出飛機，而總決賽MVP魯域斯基，就攞住獎項跟住老細步出，之後成班球員接受現場球迷歡呼慶祝，逗留三十分鐘先離開。
小牛雖然稱王，卻非下屆奪標大熱。當地博彩公司拉斯維加斯希爾頓競賽，就睇好熱火能夠喺下季奪冠，賠率為3倍，次熱為公牛（7倍），小牛只能同湖人、雷霆同列第三熱門（8倍）。