「走光天后」有村智惠奇招博出位！做天后除咗有真材實料，仲要識得爭取曝光機會，日本高球女將有村智惠深明此道，為挑戰日本一姐宮里藍地位，不但抄足「藍姐」成功路，仲利用傳媒增加曝光率，場內場外經常着短裙騷腿，不時被影到走光照，咁都得？抵你咁紅！
有村智惠野心極大，眼見一姐宮里藍在世界高球壇人氣旺盛，於是決心複製其成功路。有村高中時期入讀「藍姐」母校東北高等學校，並在當地開始成名，一度引起各界廣泛討論。除咗讀埋同一間學校，有村智惠同宮里藍仲有另一個共通點，兩人本身都有畏高症，嘩！有冇咁蹺啊？
經過一輪抄襲，有村智惠在高球圈子開始受到重視，為咗超越宮里藍成為日本高球一姐，有村決定用娛樂圈女星上位招數突圍，出席活動時經常着短裙，比賽期間亦着住裙仔，須知打高球要「擒高擒低」，呢位姐仔成日不經意走光，啱晒日本傳媒胃口，難怪近年曝光率不斷冒升！
現時有村智惠人氣愈來愈勁，不時有機會現身電視節目，代言工作亦愈來愈多，已經開始威脅一姐宮里藍地位。不過，要真正超越「藍姐」，單靠豪爽騷腿露底並唔夠，有村必須提升世界排名，咁先可以成為日本高球No.1女將！
年齡：23 身高：1米59
血型：O型
轉打職業賽年份：06年
現時世界排名：20
個人最高世界排名：16（2010年4月12日）