NBA總決賽今晨進行第四回合賽事，小牛球員史堤芬遜火上加油，指熱火兩大主力勒邦占士同韋迪都係演員，最鍾意扮嘢，博球證吹罰對手犯規，佢仲呼籲隊友要打得更加硬淨，唔係只會畀熱火恰到上面！
（高清翡翠台、now 635及有線165台今晨9時直播）
史堤芬遜表示：「韋迪同勒邦占士都係出色嘅演員，你掂一掂佢，佢哋嘅反應都非常誇張，另外韋迪好鍾意向球證投訴，一場波可以同球證投訴六、七次，我哋面對熱火一定要打得硬淨啲，不過要小心畀球證吹惡意犯規！」
對於史堤芬遜嘅挑釁，韋迪卻冷靜地回應：「現階段我只會集中備戰，其他嘢唔會理咁多，打完決賽先至講啦！」
雖然熱火未攞冠軍，但旗下球員就豬籠入水，據美國傳媒報道，勒邦占士嘅球衣同波鞋銷量都係排第一位，全年贊助收入就高達3,400萬美元（約2.6億港元），排NBA第一位，韋迪就以1,200萬美元（約9,300萬港元）排第三位，第二位係湖人嘅「萬人迷」高比拜仁。