活士世界排名受質疑

【本報綜合報道】活士自從被踢出一哥寶座後,連帶世界高爾夫排名榜都受到質疑,因此雅虎體育另起爐灶,搵齊全世界三十個專家為球手打分,另立一個雅虎排名榜,結果世界排名13位嘅活士,喺雅虎排名榜亦未能打入十大,而兩個排名榜嘅前三名就一模一樣,順序係當奴、韋斯活同基瑪。

另外,「老虎」活士近年成績急跌,自09年11月以來未贏過任何錦標,世界排名跌至13位,兩年來收入亦減少5,000萬美元,但其收入仍然穩居世界體壇一哥寶座,美國《福布斯》最新公布嘅全球收入最高50名運動員名單,活士以7,500萬美元(約5億8,500萬港元)排第一,拋離高比拜仁、勒邦占士、費達拿及碧咸等巨星。

形象插水仍獲廣告商支持

呢份名單係計算運動員過去一年嘅工資、獎金同廣告收入,未爆出性醜聞之前,活士嘅總收入已經超過10億美元,係體壇第一人,所謂爛船都有三斤釘,雖然佢近兩年形象同成績雙雙插水,多個廣告贊助如吉列、百事、AT&T相繼離開,但仲有Nike同EA Sports電玩兩條大水喉射住,Nike高爾夫球部門去年收入達到6億3,800萬美元,而今年推出嘅活士電玩遊戲亦大受歡迎,令活士保持高收入。

排第二嘅高比拜仁,同埋第三嘅勒邦占士,同活士都有一段距離,高比拜仁收入為5,300萬美元,比活士少2,200萬美元,勒邦占士嘅收入就有4,800萬美元。