柏賓「偉論」辣着晒！
NBA總決賽將於香港時間六月一日（周三）早上開騷，展開7場4勝制Game 1，大家焦點都放喺「大帝」勒邦占士決戰「德國槍」魯域斯基身上，喺呢個咁緊張嘅時候，前「公牛二哥」柏賓語出驚人，指「大帝」已超越米高佐敦成為最偉大嘅球員，此番言論引來「波神」死硬派球迷不滿，波神之子亦力撐父親，話唔會聽番呢個訪問。
柏賓多年來同米高佐敦出生入死，兩人稱兄道弟，被喻為「公牛王朝」最佳拍檔，但柏賓日前接受ESPN訪問時，竟然貶低老友抬高勒邦占士，好多球迷都唔認同佢嘅講法。柏賓表示：「米高佐敦係偉大嘅射手，但勒邦占士可能係目前為止最偉大嘅球員，佢可以隨心所欲得分，並且令每個人都參與進攻。」
巴克利插熱火未夠班
好多「波神」球迷即時作出反擊，話米高佐敦有六隻冠軍指環，而勒邦占士一次冠軍都未攞過，兩人根本不能相提並論。佐敦好友巴克利亦幫拖，話熱火根本未成氣候，總決賽相信難敵小牛。波神之子索性話唔會聽番個訪問，擺到明當柏賓吹水！
此外，火箭新教練人選已有定案，就係前塞爾特人名將麥希爾，佢曾於○八至○九年度短暫教過木狼，火箭聘請佢嘅決定令人頗為意外。
本報綜合報道