傑志上周勇奪聯賽冠軍，今季佢哋入波最多失球最少，捧盃實至名歸，咁辛苦先至攞到冠軍，淨係影威水相實在唔夠，佢哋應該得到更多榮譽，其實港甲大可以仿傚歐洲各地聯賽，畀傑志整件象徵聯賽冠軍嘅特別版波衫比賽，此舉令人一眼就睇到，佢哋就係冠軍球隊！
熟悉歐洲波衫行情嘅fans都知道，歐洲主流聯賽好似英超、德甲同荷甲冠軍球隊嘅波衫好易識別，皆因冠軍隊波衫上可以印上一個金色徽章，同其他球隊用嘅普通章相比尊貴好多，好似今屆德甲拜仁就用緊呢個金章，不過下屆就要讓畀新科冠軍多蒙德嘞。
意甲雖然不設金章，但聯賽冠軍就可以喺波衫上面繡上一個象徵意大利國旗嘅紅白綠三色盾章，而代表意大利盃嘅就係一個圓形三色章，睇番國際米蘭今季件波衫，意甲、意盃、歐聯、世冠盃各項冠軍印記，黐到成件衫都係，真係非常威水，亦令呢件波衫特別有珍藏價值。
其實近年香港球隊嘅波衫都有一定捧場客，如果可以學吓人哋搞呢類光「徽」印記，一則球員着住件金章戰衣，自有一份自豪同榮譽感，而戴緊普通章嘅就會有股推動力去爭取，球迷方面又可以擁有一件等同特別版嘅波衫，最重要係呢樣嘢花費無幾，要搞真係唔難，波男都好希望來季見到傑志着住件金章波衫比賽架！
波男