灰熊絕地反擊加時勝雷霆
【本報綜合報道】灰熊再度上演大逆轉！以西岸第8種子躋身季後賽嘅灰熊，昨日喺第3節末段仍落後16分嘅劣勢下，最後竟能逼和對手打加時戰，最終於主場以101比93擊敗雷霆，總比數領先2比1，蘭度夫更成為今季季後賽，首位雙20球員！
灰熊兩名內線球員馬克加素及蘭度夫今仗表現出色，馬克加素今場得16分雖然唔算多，但防守落力，令雷霆嘅杜蘭特及韋斯布克難以剷入內線，而拍檔蘭度夫更奪得21分及21籃板，兩項數據都創下佢季後賽生涯新高。
蘭度夫做出雙20
雷霆今仗落敗，主要係替補球員交唔到貨，大大加重杜蘭特同韋斯布克嘅負擔。攞咗22分嘅杜蘭特寫下今季季後賽嘅新低，佢話：「咁樣輸法確實難以接受，但我哋必須忘記敗仗，全力應付第4戰。」