塞爾特人追成1:2
昨日NBA東岸大戰，場數落後0比2嘅塞爾特人，返回主場終於勝出漂亮一仗，以97比81擊敗熱火，總比數追成1比2。賽事嘅轉捩點係朗度比賽中途扭傷左手退下火線，但包紮好後立即返回球場，激發起其他隊友嘅鬥志，成為綠軍贏波嘅頭號功臣！
負傷再戰激起士氣
塞爾特人同熱火上半場一直處於拉鋸，打到第3節時朗度同韋迪一次碰撞中跌低扭傷左手，要立即送入更衣室接受治療，當所有人都以為朗度要退下火線，但佢竟然喺第3節末段重返球場，除咗換來主場球迷嘅熱烈掌聲，更激發起隊友嘅鬥志。
紮住左手嘅「獨臂俠」朗度，返回球場後狀態更勝之前，交出多次漂亮助攻，佢全場取得6分、3籃板及11助攻，表現搶鏡。綠軍另一位贏波英雄係加納特，佢交出28分及18籃板，美國傳媒形容佢好似後生咗7年，因為加納特喺7年前28歲之年，曾經做出30分及19籃板嘅驚人紀錄，而傷愈復出嘅奧尼爾只係上陣咗8分鐘，明顯不在狀態。
熱火三巨頭冇貨交
至於熱火今仗表現令人失望，三巨頭韋迪、勒邦占士及保殊投射命中率奇低，「大帝」僅入15分。韋迪話令到朗度受傷感到唔好意思，希望下仗可再次同佢較量，至於朗度則表示傷勢沒有大礙，下仗主場對熱火仍可披甲。
本報綜合報道