西岸準決賽第1戰 湖人磨刀劏小牛
NBA香港時間明早續演兩場季後賽次圈賽事，衞冕總冠軍嘅湖人主場迎戰小牛。今仗最大看點當然係加素大戰魯域斯基，加素賽前表示，好希望可以喺西岸決賽同細佬馬克加素決一勝負，所以一定會盡力砌低小牛，而湖人主將高比拜仁雖然持續受傷患困擾而缺席操練，但今仗仍會正選掛帥。（now 678周二早上10時30分直播）
加素大戰魯域斯基
NBA史上兄弟兵唔算多，較為人熟悉係派斯兄弟、巴利兄弟、格蘭兄弟同戴維斯兄弟等，喺決賽場合出現兄弟內訌嘅情況就更加少之又少，難怪加素咁渴望喺西岸決賽同細佬馬克加素率領嘅灰熊硬撼啦！加素表示：「細佬喺季後賽發揮出色，灰熊防守好又夠團結，好有球味，佢擊敗馬刺後我即刻Send短訊恭喜佢，話希望可以喺決賽同佢相遇。」
不過，加素要鬥灰熊，就首先要過小牛呢關，小牛主將魯域斯基進入季後賽後狀態大勇，每場平均射入廿七點三分同七點八個籃板球，罰球率更高達八成九。不過加素仍然話有信心可守住佢：「我會盡量干擾佢射波，同埋減少犯規，因為佢罰球真係好準。」
高比拜仁輕傷上陣
至於一直帶傷上陣嘅高比拜仁就缺席咗周日嘅操練，但佢表示無礙今仗上陣：「我嘅傷勢冇乜大礙，只係爭取時間休息同康復。」湖人同小牛今季常規賽交鋒三次，湖人贏咗兩次，當中包括今年愚人節大勝小牛二十八分，又睇吓湖人能否於七場四勝制賽事先拔頭籌啦？
本報綜合報道