塞爾特人贏到3:0
在常規賽尾段跌Watt嘅塞爾特人，正用表現說明佢哋季後賽先嚟料！綠軍「四天王」加納特、雷阿倫、皮雅斯及朗度尋日作客麥迪遜廣場公園齊齊交到貨，其中朗度獲得「三雙」之餘，20次助攻更追平塞爾特人季後賽隊史紀錄。結果塞爾特人輕鬆大勝紐約人113比96，總場數領先3比0，出線次圈機會高唱入雲。
今季同時入選全明星賽嘅綠軍「四天王」，今場表現可謂無懈可擊，皮雅斯19次起手中14球，三分球8射6中，合共轟入38分，雷阿倫則貢獻32分，三分球11射8中，史上三分王名不虛傳！加納特雖然只入9分，但「KG」搶得12個籃板及有3次搶截，防守上交足貨。
老人兵團季後賽嚟料
至於最年輕嘅朗度為綠軍貢獻「三雙」15分、11個籃板及20次助攻，助攻次數追平隊史季後賽紀錄之餘，季後賽生涯第6次獲得「三雙」，亦成為NBA史上第7人能在季後賽獲得6次「三雙」，現役球員中次數最多係傑特，達到11次。「四天王」獲得如此華麗數據，續缺比立斯嘅紐約人自然難以抵擋，最終大敗17分，首圈連輸三場，睇怕都難以翻身。
塞爾特人在季後賽判若兩隊，其實已非甚麼新鮮事，事關呢支「老人兵團」上季以東岸四號種子，同樣被睇淡下，卻先後淘汰東岸一、二哥騎士及魔術殺入總決賽，今季絕對有權再嚟多次。
魔術1:2落後鷹隊
相反，另一爭標分子魔術就頗令人擔心，佢哋尋日以84比88不敵鷹隊，總場數落後到1比2，亦係季後賽暫時唯一排名較高，但場數落後嘅球隊。魔術「入樽王」積遜李察遜賽事尾段同鷹隊中鋒柏祖利亞衝突，雙雙被罰出場。
戰果放送
紐約人 96:113 塞爾特人
鷹隊 88:84 魔術
黃蜂 86:100 湖人
註：前者主場