大帝媽戀上高中生!

「大帝」勒邦占士嘅媽咪哥莉亞,再爆不倫之戀,同一個高中生男模行埋,而「大帝」嘅熱火隊友「閃電俠」韋迪,就「爭仔」成功!韋迪同前妻嘅紛爭告一段落,法庭將兩子撫養權判畀韋迪,令「閃電俠」放下心頭大石。

「大帝媽」哥莉亞,近日畀美國八卦網站www.terezowens.com刊登同一名男子嘅擁抱照。據該網站爆料,哥莉亞正同呢位名為Cliff嘅高中生撻着,Cliff係一名模特兒兼演員,因為後生又靚仔,一直頗受女士們歡迎,盛傳他令「大帝媽」神暈顛倒。其實哥莉亞近年不斷被爆出「姊弟戀」,去年曾經傳出搭上「大帝」嘅前騎士隊友、現已轉投塞爾特人嘅韋斯,不過雙方其後都作出否認,「大帝」更搵律師作出澄清添。

韋迪「贏前妻」喜獲兩子

韋迪同前妻爭奪兩子撫養權就好比一場漫長戰役,兩人去年正式離婚後開始對薄公堂,結果芝加哥法院宣布將撫養權及監護權判畀韋迪。韋迪話一直希望陪伴兩子成長,務求將最好嘅都給予兩個囝囝,攞到撫養權後,韋迪揚言會盡力做個好爸爸。