本地甲組聯賽今日舉行兩場護級搶分戰，下午三時假屯門鄧肇堅運動場先上演屯門主場對四海流浪，下午六時移師九龍灣公園舉行大中對港會。屯門教練盧光中表示，球隊護級在望今仗不容鬆懈，主場出擊定必全力搶分。
上輪聯賽大中負於晨曦後，聯賽下游形勢漸告明朗，港會僅得兩分排榜末，尾二嘅大中亦被晨曦及屯門拋離六分，雖然數字上仲有得追，但大中餘下五仗對手尚有公民、傑志及南華，要脫離護級漩渦難度甚高。
屯門今季初上甲組，首要目標係站穩陣腳避免降班，由於屯門在聯賽兩循環均擊敗大中，加上現時比大中多六分，護級壓力已大大減輕，不過盧光中表示不容大意，他說：「依家至係護級重要關頭，不容放鬆，到真係護級成功先講。」屯門今仗將「夫添」出擊，全力搶分。
現有廿一分排第五嘅四海流浪，只要今仗戰勝屯門，便毋須理會大中對港會戰果，即時護級成功。不過就算負於屯門或和波，只要大中未能擊敗港會，四海流浪亦可「上岸」，所以該隊今仗作客屯門，心態上相對較為輕鬆。
尾場大中對港會之戰實力接近，首循環交手踢成二比二，兩隊近況亦低沉，港會上仗狂吞大埔六蛋，大中亦以○比四負於晨曦，今仗交手勝負難料。
甲組足球聯賽
3:00pm : 屯門 Vs 四海流浪
地點 : 屯門鄧肇堅運動場
票價 : $60、$20(特惠票)
6:00pm : 大中 Vs 港會
地點 : 九龍灣公園
票價 : $60、$20(特惠票)