波男一向欣賞皇馬主帥莫連奴，除咗夠型夠寸，仲識得收買人心，連麻煩友伊巴謙莫域受訪時都話可以為莫帥殺人，足見佢有幾charm！呢位名帥叻在懂得同手下建立良好關係，絕對係每個人夢寐以求嘅上司，個阿頭咁掂，班兵自然甘心賣命啦。
傳媒對莫連奴又愛又恨，鍾意佢金句多，新聞價值夠高，但最憎佢寸到爆炸。站在僱主角度睇，莫連奴絕對係個好能幹嘅管理階層，可惜佢太照顧自己啲下屬，成支頂心杉咁吓吓頂住晒，所以搞到同皇馬高層華丹奴關係緊張。不過，一講到同球員關係，莫帥敢認第二，相信冇乜人敢認第一。
莫連奴每教一間球會，都會同球員建立深厚感情，喺車路士同杜奧巴情同父子，去到國際米蘭亦贏得惡爺馬特拉斯尊重，連球壇著名自大狂伊巴謙莫域都畀莫帥治得掂，足見佢功力有幾深厚。莫帥依家去到皇馬，除咗錫晒天之驕子C朗，對住敗家仔賓施馬都沉得住氣循循善誘，真係唔簡單o架。
貴為當今球壇頂級名帥，莫帥地位極高，但對住班手下唔會企得高高在上，面對傳媒或球會高層批評時，仲經常挺身而出幫班細頂晒。為啲手下同上面頂頸，可能有人覺得佢好傻好天真，不過，有個能幹又錫自己嘅阿頭，做細嘅梗係仆心仆命一人行多步啦。莫帥有料又有人情味，抵佢咁多人鍾意。