速度之戰羅斯贏禾爾
被譽為NBA速度最高嘅控衞戴歷羅斯與約翰禾爾，尋日正面交鋒合演「速度之戰」，結果前輩戴歷羅斯技高一籌，率領公牛以105比77大勝巫師。
一向以速度聞名嘅戴歷羅斯曾經講過，今季新秀狀元約翰禾爾係聯盟中最快嘅控衞，速度甚至高過自己。不過，約翰禾爾今場卻受制於羅斯仔，全場14次起手僅入3球得9分，而其餘隊友手風欠順，歷克楊格及巴特治命中率低，而劉易斯更被貶後備僅上陣10分鐘，最終巫師大敗28分。
巫師球迷都讚羅斯係MVP
全場攻入21分、交出9次助攻及3次搶截嘅戴歷羅斯，無疑成為今場主角，難怪連主場嘅巫師球迷，比賽期間都忍唔住高呼「羅斯就是MVP」，明顯被羅斯仔嘅表現深深打動。戴歷羅斯賽後表示好享受作客時獲得敵對球迷認同，令佢打得特別起勁。公牛贏波後已取得常規賽三連勝，反映出中鋒諾亞復出的確作用甚大。
另方面，輸波嘅巫師與剛從鷹隊換入嘅碧比達成「分手協議」，呢位32歲控衞放棄價值620萬美元、還剩一年嘅合約。據碧比經理人所講，碧比現階段已不在乎薪酬多少，只希望成為自由身後，可以加盟一支具爭標能力嘅球隊。據悉碧比極大機會轉投熱火支援「超級三巨頭」。
本報綜合報道