球衣退役榮耀洛文實至名歸

活塞已決定在今年愚人節四月一日，為舊將「小蟲」洛文高掛球衣，其10號戰袍將會永久在奧本山宮殿榮休。相信唔少球迷都有疑問，點解活塞肯為「小蟲」榮休球衣，但公牛就仲未呢？個人認為洛文喺職業生涯後期嘅場外花邊新聞太多，加上私生活又唔檢點，公牛好可能因為形象問題而縮沙。

不過，洛文喺阿裕心目中始終都係一位傳奇人物，好多人都以為呢位七屆ＮＢＡ籃板王只係識搶板同出陰招，但其實喺大學時代，洛文係一位場均攻入25分以上嘅飆分球員。所以阿裕最欣賞就係洛文加入ＮＢＡ後，願意配合球隊戰術而專注防守，結果獲得ＮＢＡ籃板王美譽之餘，亦曾兩度獲選為最佳防守球員，防守功架絕非浪得虛名。

若然香港都好似ＮＢＡ咁，會為球員榮休球衣嘅話，阿裕認為縱橫籃壇廿載嘅吳柱業先生，絕對配得上呢個榮耀。吳柱業球技出眾無人不知，曾為威立、永倫及香港隊奪得多項錦標，再加上佢為香港籃壇貢獻良多，其５號球衣絕對值得高掛在修頓之內。