【本報綜合報道】「NBA之恥」騎士延續連敗紀錄，尋日在主場以94比103不敵活塞，常規賽連輸26場，追平美國四大聯盟最長連敗紀錄。不過屢創劣績嘅騎士似乎已疊埋心水放棄今季賽事，據悉球會已瞄準了被譽為「新大帝」嘅俄亥俄州立大學新星薩寧加，希望今季能奪狀元籤選薩寧加作重建重心。
賽前已連輸25場嘅騎士，開賽後未見有何起色，半場過後已落後12分，士氣及實力均比人弱之下，下半場根本難以翻盤，最終以94比103輸波。連敗26場後，騎士已追平美國四大聯盟NFL（美式足球）、MLB（棒球）、NHL（冰球）及NBA嘅最長連敗紀錄，此前分別有NFL球隊海盜在1976/77球季，以及MLB球隊陸軍上校在1889年所創出連敗26場劣績。
騎士現時成績為8勝45負在聯盟包尾，不過墊底都未嘗冇好處，至少可以增加取得狀元籤嘅機會。據悉騎士已睇中俄亥俄州立大學新星薩寧加，呢位18歲前鋒無論身形定打法，都被形容為極似勒邦占士，所以有「新大帝」稱號。多個美傳媒就估計，若然騎士能取得選秀頭籤，肯定會揀呢位超新星。