騎士輸波占士偷笑
今季失去「大帝」勒邦占士嘅騎士，尋日打出創會以嚟最羞恥一仗，作客以57比112不敵湖人，大敗55分及僅取分57分，均寫下球會歷史新低，難怪主將莫威廉士都話冇面返回克利夫蘭。正所謂有仇不報非君子，已成騎士叛徒嘅勒邦占士，在比賽期間立即上twitter落井下石，留言嘲笑舊會！
上季常規賽冠軍騎士，由於今夏失去勒邦占士及奧尼爾等主力後，已淪為東岸魚腩，再加上今場有吉遜、安東尼柏加及華拿祖等主力球員因傷缺陣，面對湖人就等於細路對大人，毫無還擊之力。湖人單喺上半場已經領先32分，提早兩節進入垃圾時間，最終大炒對手55分，成為球會史上第三贏分最多嘅NBA賽事。
莫威廉士冇面見球迷
騎士今場僅攻入57分，以及大敗55分兩項數據，均打破球會史上最差紀錄，此前球會最低得分紀錄為97年對馬刺時所創嘅59分，而對上一次最大分差輸波，則係70年不敵76人，輸54分。今場9射僅1中嘅莫威廉士賽後表示：「真係超級尷尬，根本冇面返去克利夫蘭。」
騎士恥辱性大敗，相信最開心會係「叛徒」勒邦占士，「大帝」在比賽去到第四節時，就在twitter上載了一則留言，寫上：「實在太瘋狂，詛咒別人是不對，人在做，天在看！」雖然「大帝」並冇明寸騎士，但眾所周知自從占士離開克利夫蘭之後，就一直遭受騎士高層及球迷詛咒，所以難免令人聯想到占士正在落井下石。
本報綜合報道