反擒湖人馬刺乘勇劏牛
NBA明早上演西岸榜首大戰，西岸次席球隊小牛主場迎戰「一哥」馬刺。馬刺狀態大勇，尋日主場以97比82擊敗湖人，明早「德州打吡」勢必乘勝追擊，反觀小牛主將魯域斯基早前受傷，今仗未知能否復出，睇怕馬刺嘅聯盟「一哥」位仲有排坐！
（now 635周五早上10時30分直播）
先講尋日場波，剛啱輸畀熱火嘅湖人，開賽早段相當積極，高比拜仁頻頻爆籃硬闖馬刺心臟地帶，湖人半場領先44比42，但下半場馬刺開始發力，柏加負起領軍重任，最終以15分之差反擒湖人。
小牛冇魯域斯基擇使
高比拜仁今仗起手高達27次，但命中率甚低，僅得21分，馬刺嘅防守專家真路比利將高比仔完全凍結，令佢全場失誤多達5次，而柏加就取得全場最高嘅23分，兩人都係馬刺嘅贏波功臣。馬刺贏波後，成績改寫至27勝4負，繼續喺西岸及聯盟領先。
另一邊廂，小牛因主將魯域斯基右膝扭傷，缺席尋日對速龍嘅賽事，結果小牛主場以76比84爆冷不敵速龍，十一年來首次喺主場輸畀對手。據小牛軍醫透露，魯域斯基傷勢唔算嚴重，但明早嘅「德州打吡」能否上陣只係五五波，如果魯域斯基缺陣，小牛睇怕都好難同狀態咁弗嘅馬刺匹敵。
本報綜合報道