二○一○年仲有兩日玩完，本地球季亦過咗一半嘞，統計上半季嘅入場人數同票房數據，成績最好前三位係南華、屯門同大埔，其餘各隊嘅入座率同收入都唔理想，票房最差嘅係業餘班港會，而尾二嘅公民總收入只得二萬六千幾蚊，以該隊五百萬班費計算，絕對可以用「滔滔籮時」嚟形容。
究竟甲組波有乜出路？有人話屯門同大埔吸引到一班街坊球迷，即使蝕錢都叫做搞到地區氣氛，希望波總將甲組賽事全面地區化咁話。查實睇番數據，兩支地區隊嘅收入亦係好極有限，屯門上半季主場票房收入大約係二十萬，但佢哋全年班費係四百萬，呢個收入只及班費支出嘅半成，大埔半季收入係十二萬幾，情況比屯門仲差。
本地波打一場蝕一場，呢個情況已經持續咗十幾廿年，甲組球會經營困難唔係新鮮事，但仍然有咁多班主願意投入搞波，全靠佢哋每年掟幾百萬出嚟組軍，本地足球先可以維持運作，波男實在要向咁多位熱心班主致敬。