火箭老闆出名無情
曾經為火箭奪得兩屆總冠軍嘅奧拉祖雲，九年前只獲阿歷山大提供一紙3年約1000萬美元嘅續約條件，對一位球會史上最大功臣嚟講，簡直屬一種恥辱！雖然阿歷山大其後加碼至1300萬，但續約一事已令奧拉祖雲心碎，最終佢以先簽後換方法改投速龍，並短短効力一季就退休，職業生涯未能「從一而終」。
對於當時嘅奧拉祖雲嚟講，錢銀只屬其次，離隊主要因為感到不受尊重。如今就輪到後繼人姚明，雖然姚明未曾為火箭獲得任何錦標，但「小巨人」至少為火箭帶來不少經濟效益，為阿歷山大賺取咗唔少「人仔」，如今一傷就宣布換走佢，令人心酸。