戰績持續低沉嘅巫師，早前送走咗「麻煩友」亞連拿斯後，以為可以解決內部問題，但「麻煩友」又豈止一個？巫師兩大內線主力麥基及巴特治，日前被揭喺一所夜店外大打出手，雖然兩人都冇受傷或被捕，但講手難免影響球隊士氣，相信聽朝面對馬刺，輸波機會相當高。（周一早上8時開賽）
據《華盛頓郵報》消息指，事件發生在當地時間周五早上，話說麥基與巴特治先在華盛頓一所夜店Shadow Room內發生口角，當時兩人愈鬧愈激，跟住就有人目擊佢哋在夜店外大打出手，要保安員介入先收手，可幸係兩人均未有被捕，亦冇受傷。
主角之一巴特治在事後否認與麥基講手，但就承認兩人確有肢體上衝突，但只係輕微推撞。至於巫師亦冇隱瞞，球隊發言人在當晚隨即作出回應，表示經調查後，兩名球員只屬意見上出現少許分歧。巫師聽朝將會作客聖安東尼奧，由於球隊今季13場作客賽事全敗，加上近日又爆出呢單嘢，士氣跌至谷底，相信難阻馬刺取勝。
另外，NBA今季收視率大幅飆升，《美聯社》指ESPN及TNT轉播嘅NBA收視率較去年增長30%，而組成「三巨頭」後嘅熱火，其比賽更較上季增長69%，可見熱火今季確人氣爆燈！
本報綜合報道