港隊急Call你哋嚟幫拖！
唔夠人打都要打！縱然香港籃球代表隊今晚於灣仔新伊館舉行的「金至尊超級工商盃國際籃球邀請賽」四強戰面對「長勝將軍」信誠集團，雖然牌面輸蝕，但新進主力周健宏卻直言對手實力佔優，今仗是場「六四波」，但港隊上下卻擁有「唔怕輸」的精神，只要有球迷入場力撐，他們就甚麼對手都不怕，甚至爆冷贏波入決賽，亦絕非Mission Impossible！
港小將進步明顯
衞冕的港隊今屆為備戰二○一三年東亞運，故選人方面着重年輕化，整體實力難免削弱！雖然分組賽首仗擊敗印度，但在日前卻以五十八比八十八不敵美國南加州福建同鄉會，只能以A組次名出線，今日的準決賽便要硬撼B組首名的勁旅信誠。
對於球隊遭逢新敗後即遇上強敵，領隊林植昌希望主場球迷可以「幫手」協助港隊過關：「對手好全面，身形高大有內線兼且遠射又準，要贏佢哋真係有啲難度！好在港隊班後生仔喺今次賽事學咗唔少嘢，周健宏、陳翊麟同埋蔡龍德都有明顯進步，佢哋隨時會有驚喜畀大家，所以球迷一定要入場撐港隊！」
信誠謙稱好業餘
不過，雖然信誠被睇高一線，但教練施能銅卻謙稱沒有把握獲勝：「大家都係籃球愛好者，輸贏真係唔重要，我哋各樣都比港隊差，唯一優勢就係身高。」信誠隊長陳榮仁更「自踩」球隊其實很業餘，相反港隊卻在訓練上顯得很專業。但事實上，信誠陣中「三分王」張佳濱現時以十五個三分球遙遙領先，再加上身高達兩米○二的「封阻王」黃清彬，論晉級機會實高於港隊。
另一場四強戰美國南加州鬥菲律賓，前者於分組賽全勝，射手楊基登的三分球更是球隊取分之鑰；菲律賓則個人突破力強，估計是「五五波」。
今日賽程
今日賽程 時間 賽事 對賽球隊
5:00pm 第5名 名次賽 印度Vs新麗寶
7:00pm 準決賽 香港Vs信誠
8:45pm 準決賽 美國南加州Vs菲律賓
票價：$100、長者及學生$50
地點：灣仔新伊館