乜嘢叫做料事如神？喺國際足協宣布二○一八及二○二二年世界盃決賽周主辦權前四小時，美國著名汽水公司百事可樂已洞悉先機，斥資二十四億鎊（約二百九十億港元）收購俄羅斯飲品公司Wimm-Bill-Dann，時間夾得啱啱好，同八爪魚神算有得揮！今次世界盃主辦權過程一直黑幕、疑雲、話題重重，百事此舉難免會瓜田李下，被人大做文章。
世界盃堪稱全球最具商業價值體育盛事，大型跨國企業往往不惜花巨資爭取成為大會指定贊助商。即使未能成為贊助商，亦要絞盡腦汁，務求爭奪市場。百事可樂於國際足協公布投票結果前四小時，斥資二十四億鎊收購俄羅斯飲品公司Wimm-Bill-Dann，創下該企業最大海外購併交易。事實上，體育比賽一向係飲品公司推廣產品嘅重要平台，屬於兵家必爭之地。
據悉，百事可樂完成收購Wimm-Bill-Dann嘅時間，剛好於各國完成最後陳述，委員準備投票時，由此可見百事早對俄羅斯充滿信心。百事可樂行政總裁努伊表示，完成今次購併，可令集團於俄羅斯飲品市場佔有領導地位。
Wimm-Bill-Dann成立於一九九一年，總部設於莫斯科，係歐洲最大牛奶及飲品公司之一，其牛奶產品於俄羅斯擁有百分之三十四市場佔有率，果汁方面亦有兩成市場佔有率。百事可樂入主Wimm-Bill-Dann之後，可以打入俄羅斯市場，準備迎接二○一八年世界盃帶來嘅龐大商機。
本報綜合報道