話投唔投 跣低英國 踢爆七大反骨仔！
【本報綜合報道】英格蘭巨頭貝頓離職前喪插國際足協（FIFA）！英格蘭申辦世盃失敗，足總主席貝頓唔想同FIFA打交道，決定劈炮唔撈。與此同時，英國傳媒窮追猛打，篤出七個國際足協成員反口覆舌唔撐英方，包括副會長華拿，令呢班仁兄成為英國公敵。
英格蘭足總主席貝頓今年五月以替工形式上任，佢不滿世盃投票黑箱作業，向傳媒力數FIFA：「我哋喺四個申辦單位評估係最好，最後只得兩票，好難相信投票係客觀同公正。」貝頓話做足總主席成日要同FIFA成員接洽，唔想同啲唔可信嘅人合作，於是決定辭職。
英國《太陽報》繼續爆料，指出有七個國際足協成員反口唔撐英格蘭，包括副會長華拿及鄭夢準，美國代表巴拉沙、危地馬拉代表沙古里路、塞浦路斯代表利夫卡里迪斯、土耳其代表艾斯克同科特迪瓦代表安奴馬，鄭夢準更被爆同英格蘭交換投票，英格蘭喺二○二二年申辦權投咗畀南韓，真係蝕晒章。
俄國搵KGB使橫手？
英國《每日星報》就話俄羅斯使橫手爭辦世盃，出動前蘇聯國家安全局（KGB）收買FIFA成員，據知情人士透露：「俄羅斯總理普京成日出茅招爭辦體壇盛事，二○一四冬奧都係靠佢搵KGB收買國際奧委會要員先成事。」
英格蘭未能再辦世盃，惟有搵地方發洩不滿情緒，英足總取消下年六月作客泰國場熱身賽，此舉為報復泰國FIFA代表馬古迪唔支持佢哋，似乎小器咗啲喎。