嘩嘩嘩！邊爐子文成為「獎牌記者」，真係與有榮焉！亞運會正式開幕後，小記首日出擊採訪兩個項目，港隊分別勇奪一金一銅。相比起李慧詩嘅單車金牌，我更替女子接力隊攞到4ｘ100混合泳接力銅牌開心。小記可謂睇住佢哋大，今次四人實牙實齒擊敗南韓登上頒獎台，意義非常重大。
邊爐子文一直都有採訪學界體育新聞，所以早就認識呢四位女子選手。佢哋多年來努力不懈，稱霸學界後就成為香港隊成員，上屆亞運佢哋因為對手被取消資格而奪得第三，事後都出現過唔少閒言閒語，四個小女孩當然會因此而難受。
今次佢哋再接再厲，發揮出色擊敗南韓隊而奪銅，可以話係以真正實力攞牌，我呢位「叔叔」看在眼裏，都覺得好激動。我深信四朵小金花可以繼續進步，將來為香港再次爭光！