繼大埔同沙田後，新球季又有一支由丙組逐級殺上甲組嘅地區球隊，呢隊就係屯門！屯門以一班幾乎全無甲組經驗嘅球員踢港甲，佢哋教練盧Sir盧光中坦言球隊實力有限，多數要護級，不過佢哋勝在有靈籤庇佑，新球季冇有怕！
本地波一大特色，就係好多球隊為求順順利利，好多時都會去拜神，佢哋咁做並唔係宣揚迷信，不過踢波嘅嘢，好多時好講運氣，學「金句王」Peter黃話齋「好運好過好波」，除咗努力訓練，求神庇佑亦好常見。
講到屯門有靈籤庇佑，據佢哋教頭盧Sir所講，屯門之所以能夠升上甲組，背後係有段古。香港地除咗黃大仙有好多善信去求籤，其實屯門天后廟一樣非常靈驗，盧Sir就係喺今年農曆新年幫球隊求得一支籤，憑住籤文嘅指示，佢就知道屯門一定有得升甲組！
究竟求咗支乜嘢籤咁靈？盧Sir並冇公開，佢只係神神秘秘咁話籤文係關於「西楚霸王」！一聽到西楚霸王呢位歷史人物，就知唔係好嘢，一係就「陰陵失道」，再唔係就「烏江自刎」，而結果就係屯門得此籤而獲得升班，何解？
盧Sir原來識得解籤，佢話：「西楚霸王冇錯係失敗咗，但其實佢只輸畀劉邦一個，其他人都唔夠佢打，所以呢支籤對屯門嚟講係好籤，因為最後屯門只係輸畀港會，攞到乙組亞軍升上甲組，之唔係就係咁解囉！」