歐鎧淳攞23分 游去柏克萊
香港體壇末代會考生中，一大焦點肯定是泳壇「小仙子」歐鎧淳（Stephanie），這位曾為參加北京奧運而休學一年的女飛魚，重返校園成績絕對唔失禮，今屆會考取得23分，在嘉諾撒聖心書院原校升中六當然冇問題，不過她已準備負笈美國入讀著名「游泳學府」柏克萊大學，繼續游水同讀書雙線發展。
榜前失眠 榜後開心
歐鎧淳共報考九科，成績為1A、3B、4C、1D，Stephanie坦言會考比任何一次比賽都緊張，放榜後終鬆一口氣：「其實這個成績已很滿意，因為曾停學一年，要更努力追回進度，而且考試唔同比賽，考試係自己一個人嘅事，壓力好大，比賽就有教練同我分擔，所以即使出戰京奧，都比唔上會考咁緊張。」
放榜前一晚歐鎧淳有到泳池練習，並緊張到凌晨二時才睡着，清晨六時便醒過來，面上都長出粒粒，幸好歐媽媽特別請半天假期與歐爸爸陪愛女放榜，取得成績單後都歡天喜地。
對於Stephanie中文被評為D級，比在學校取得的C級稍差，歐媽媽已即時上訴，要求查卷希望獲得加分。
講到讀書心得，Stephanie笑說：「讀書一定要認真，為應付會考，我有三個月關起自己狂讀。」不過她指自己成績其實唔算好，她有位兒時泳隊隊友陸茵，在會考取得10A，而嘉諾撒聖心書院亦有六位同班同學取得30分。
另外，同樣就讀聖心的泳將于蕙婷考獲16分，直升中六。