巴西出局除咗令球迷失望，部分商家亦叫苦連天，有南非賣波衫嘅舖頭為免血本無歸，不惜冒蝕本風險都要將巴西球衣減價促銷。另有專家指出，足球在巴西擁有崇高地位，今次國家隊意外失利，人民短期內將失去精神寄託，恐對國內生產、經濟造成一定壓力，影響不能小覷。
巴西球迷遍布全球，有南非當地嘅波衫舖老闆接受訪問時表示，巴西球衣以及有關精品一向最受到球迷歡迎，銷量亦穩佔前三甲，不過巴西前晚於8強戰不敵荷蘭提早執包袱，老闆立即考慮割價促銷：「巴西貴為5屆冠軍，之前演出又對辦，所以我哋入咗好多巴西波衫，一般嚟講於世界盃結束後都會減價，不過依家佢哋咁快被淘汰，銷量隨時再跌，如果唔諗辦法，我怕我哋會蝕大錢。」老闆話唔單止巴西，連法國、意大利及英格蘭球衣亦已相繼割價。
早前有英國傳媒報道，國家隊成績好壞會直接影響國民嘅「造人」意欲，雖然暫時未知今次巴西出局會唔會影響該國出生率，不過有專家表示，足球在巴西人民心目中形同國技，勝負關乎國家榮辱，今次失利一定會令國內陷入愁雲慘霧，不安情緒將遍布社會各階層，輕則導致人們無心工作，重則隨時影響商家投資，經濟影響難以估計。
本報記者