常規賽「一哥」騎士日前喺季後賽畀塞爾特人擯出局，唔少人都歸咎於「大帝」勒邦占士有傷令表現跌Watt，但原來箇中另有玄機。話說日前有美國傳媒爆料，指「大帝」開賽前得悉，其母親哥莉亞竟同騎士隊友韋斯有染，而且兩人仲已行埋一段時間，占士當然龍顏大怒，據悉佢已計劃離開克利夫蘭，要媽媽遠離韋斯，阻止孽戀繼續發展。
今次傳聞係由美國傳媒人Terez Owens所發放，事緣佢叔叔係騎士主場館過去七年嘅承包商，自然與球隊職球員非常熟稔，當中包括騎士班主丹基拔。佢指出廿六歲嘅騎士球員韋斯，已經同四十一歲嘅「大帝媽」哥莉亞行埋一段日子，消息更透過電郵廣泛在網絡流傳。
占士喺對塞爾特人第四回合前得悉真相，自小同媽媽相依為命嘅占士當然非常震怒，因為佢接受唔到隊友成為了媽媽嘅新歡！雖然今次只屬傳聞一則，但唔少美國傳媒研究後，都認為真確性頗高，事關「大帝媽」十六歲誕下占士後，「老公」走佬，佢母兼父職湊大占士成材，但芳心卻寂寞，加上韋斯最近上陣時間愈來愈少，令人懷疑二人的確「有景轟」。
有指占士為破壞呢段孽緣，已經決定在下季離開騎士，避免哥莉亞有機會見到韋斯。所以Terez Owens估計，騎士有可能盡快踢走韋斯，避免因小失大。另一方面，向來都係公牛粉絲嘅美國總統奧巴馬，亦曾向其顧問表示，希望占士會選擇來到芝加哥，改投公牛。